韓國首爾。購物勁食團(上)

期待已久既韓國首爾自由行終於成團啦,與朋友及大家姐三人出發..
由於大家都只想購物+勁食,所以我地係零觀光純消費,HAHA...
7月8日零晨機起飛,過關拎行李出閘時間約早上6點到..



個多小時後到達今次住既酒店,位於東大門WESTERN COOP..
因為要下午2點先可以CHECK-IN,所以擺底行李就周圍行了解下環境先..
大約5分鐘就行到地鐵站同新起既LOTTE FITIN,再過對面就係東大門SHOPPING既地方



其實機上食O左野,時間又太早,所以決定到明洞行下順便飲杯咖啡回下魂..
一出地鐵見到NATURE REPUBLIC 30-50% OFF癲O左,買完就開始落大雨 >_<

見到HOLLYS COFFEE環境幾靚就去避雨兼飲野..
店內有FREE WIFI,到韓國第一餐就係SWEET POTATO LATTE+芝士忌廉湯&包



之後都落住雨,但我地戰鬥力強,行埋TOO COOL FOR SCHOOL、INNISFREE、
BANILA CO.先返去酒店CHECK-IN..



明洞送SAMPLES係多D但店員一知你識國語就會SELL買大PACK裝..
所以最好諗定買D咩,就唔怕買一大堆同樣產品..



因為大攰我地休息O左3個鐘先再出去食飯..
陳玉華一隻雞..

由酒店行去都要15-20分鐘,因為佢O係小巷入面加上夜晚..
所以我都搵O左一陣先見...



可能當日落雨天,只要等幾分鐘就入得啦...
枱面已經擺好雞鍋,仲有年糕,泡菜等等,水及泡菜可自己出去REFILL..
店內有懂中文既店員,不用擔心.



因為我地唔識剪,所以店員幫手,真係幾下就剪好晒,勁!!!
加堆泡菜煮滾等雞完全熟透就可以食啦..



獨門醬料: 辣椒醬+醋+醬油+芥末
雞肉鮮嫩,醬料係靈魂,加埋勁好食,年糕、薯仔都好入味..



食到差唔多就點麵條再煮..
吸收晒湯既精華,明明已經有D飽都食唔停..
我地仲有叫CASS BEER,三人埋單都只係27,000WON,抵呀!!!

之後去O左東大門行街,但我地只係行HELLO APM已經行到12點幾..
買O左少少野,太眼瞓就打道回府啦...



第一晚係我地唯一一晚正常時間食晚飯,所以仲有肚食宵夜..
TWO TWO炸雞係出地鐵返酒店必經,所以順便買..



一半原味一半醬料,我記得都要百幾蚊港幣,唔算平但係原隻雞件上..
原味淡一點,但醬料好好食,酸、甜、辣都有..
仲有酸蘿蔔一齊食^^



第二日出發去鷺梁津水產市場食海鮮..
無記錯係要到首爾站轉車先到,其實唔係好多個站,但真係好郊外FEEL~~



愈行近市場腥味就愈勁,唔受得既朋友就唔好去啦...



檔口有好多,所以我跟網上資料搵O左一間,又係識講國語,想食咩隨便點..
呢隻黃帝蟹好大隻呀!!!!!



我地點O左生食八爪魚、燒鮑魚、蒸皇帝蟹、蒸大蛤蜊、細蛤蜊,螺係送既..
三個人食到勁飽,最正當然係蟹啦,啖啖肉,但蛤蜊都好鮮甜..

連加工費三人約130,000WON,算係我地食最貴既一餐..
但好滿足,YUMMY~~



食完再戰明洞,今日冇落雨檔口開番晒,人亦都好多好熱鬧..
ETUDE HOUSE、THE SAEM、INNISFREE、仲買O左2個電話套(1個比阿哥)



THE SAEM姐姐就收工好爽手,我同朋友每人買O左3枝BUBBLE MASK..
每人送O左10片MASK連大堆枝裝SAMPLES..

仲有ETUDE HOUSE偷雞買O左枝買一送一MASCARA..
因為朋友想再買,去第2間CHECK番先知之前既鋪擺錯,原來係冇PROMO,賺O左!!!



買到8點幾,返酒店擺底野就再去弘大食胖胖烤肉..



炭燒係重點,香港真係冇咩地方可以咁食..



黎到已經係晚上10點,太肚餓啦...
點O左2份招牌肉、1份三層肉、1份牛肋骨肉、1碗冷麵..



全部都好好食,尤其係三層肉,燒晒D肥油,外脆內軟,正!!!
泡菜同沙律都好味,我地REFILL O左N次...

食完熱野即隊個冷麵,爽!!!!