食到米芝蓮一星@萬麗海景酒店滿福樓

 

好多遊客都喜歡手執一本米芝蓮指南四出覓食..
身為香港人都算幾幸福,因為指南內由平民食肆以至星級餐廳,都近在咫尺之間..
今次試食既就係連續幾年入選米芝蓮一星餐廳,位於灣仔萬麗海景酒店既滿福樓..



環境優雅別致,仲有落地玻璃觀望海景添..


嘆杯熱茶先再點菜...


蜜汁叉燒雞肝併鹵水豬腳仔$240
一向鐘意食叉燒,呢度做得非常好,肉質鬆軟帶有少少肥,蜜味足夠唔會太多..
豬腳仔炆得夠腍又嫩滑,但因為我唔食內臟所以無食雞肝,據聞佢係呢度既招牌之一...


節瓜瑤柱鳳爪煲豬腱 $280
無落鹽既老火湯好夠味,湯渣真係煲到非常腍,入口即化呀!!
夏天多飲瓜湯可以清暑清熱添...



避風塘鱈魚粒 $260
鱈魚本身油脂夠,以煎煮較多,以油炸方式處理再用避風塘炒法,份外香口惹味..
愛食煎炸食物既我亦都食唔停口,一啖一粒好不滋味...


燒汁鵝肝安格斯牛柳粒 $330
以濃郁帶甜燒汁煮法,佐飯一流,牛肉亦都好鬆軟入味,YUMMY!!


順德煎排骨 $160
半肥瘦肉排煎得非常香口,肉質亦都好鬆化..



鮑汁柚皮唐生菜 $150
柚皮都算得上係懷舊菜式,雖然本身係平價食物,但要做得好其實十分難..
呢道柚皮個人認為炆得太腍啦,入口係即溶,但口感就冇咁豐富,不過味道就調較得唔錯..
而且老人家小朋友都O岩食..



柱侯蘿蔔牛尾撈粗麵 $80/位
我好鐘意食粗麵,不過因為今次個汁有濃濃藥材味,好似同麵食唔太夾...
但牛尾就非常出色,炆得好鬆化,夠入味又清爽唔油膩...

最後一人一個甜品作結尾..

總觀而言,今餐係一頓不錯既中菜..
尤其欣賞蜜汁叉燒、避風塘鱈魚、牛柳粒以及牛尾..
一星餐廳絕對係名副其實,仲有海景睇,算得上係一個同家人朋友歡聚既好地方^^


灣仔港灣道1號萬麗海景酒店3樓
TEL: 2584-6791