鼎泰豐@深圳國貿站

擒日因為有事要同家姐上中山,即日來回到深圳已經成7點幾啦,所以我地決定食埋野先落番香港,之前家姐已經話深圳既鼎泰豐好抵食,所以我今次就話要去試下..

金牌小籠包..

$25人仔有8粒,香港要$48得6粒咋,仲要細粒一D,深圳既大粒D而且比較多,維持一貫水準,好抵食呀..

蒜香黃瓜..

一向我都好鐘意食呢個冷盤,香港既係切圓形一碌碌,只見有少少辣油,深圳既仲O岩我口味,有花生香料O係上面,切條可以吸更多汁,而且更辣更香,仲要$8人仔咋...

三杯雞..

呢個餸好似香港冇既,個雞好滑好入味,又好熱辣辣,就咁食都唔覺咸,但就貴D,好似要$4X人仔..

紅油抄手..

好大隻而且餡好多,味道,比香港既辣一D..

担担麵..

麵條係扁身,而且湯比較多,亦比較辣,不過我覺得唔係香港既香濃,花生味唔夠...

呢餐我地食O左百頭人仔咋,真係好抵食,而且好方便去,只要O係羅湖過關,落下面一層坐地鐵,一個站就到國貿站,A出口就係啦,個商場係連住既...